حکومت مارشل لاء کے حامیوں کو فارغ کرے، میاں افتخار

پشاور: وزیراطلاعات خیبرپختونخوا میاں افتخار حسین نے کہا ہے کہ سیلاب کو جمہوریت کے خلاف استعمال کرنے کی سازش سیاستدانوں نے ناکام بنادی۔حکومت مارشل لاء کے حامیوں کو فارغ کرے اور جمہوریت پسندوں کو ساتھ لے کر چلے۔پشاور میں نیوز کانفرنس میں میاں افتخار حسین نے کہا کہ صدر زرداری اور وزیراعظم گیلانی کی قیادت میں حکومت اپنی مدت پوری کرے گی۔ میاں افتخار نے کہا کہ این جی اوز پر امدادی کام کرنے پر کوئی پابندی نہیں لگائی تاہم کسی بھی سیلاب زدہ علاقے میں انتظامیہ سے اجازت لینا ہوگی۔ میاں افتخار حسین نے کہا کہ نیشنل ڈیزاسٹرمینجمنٹ اتھارٹی اپنا قبلہ درست کرلے ان کی ویب سائٹ پر دیے گئے اعداد و شمار یکسر غلط ہیں۔ انہوں نے کہا کہ اگر دہشت گردی کے خلاف پنجاب حکومت کو ضرورت ہو تو خیبرپختونخوا مدد کے لیے تیار ہے۔ میاں افتخار نے کہا کہ عیدالفطر کے موقع پر سیلاب زدگان کے بچوں کو تحائف اور زخمیوں کو امداد کی فراہمی شروع کردی گئی ہے۔