مکلی: پاک بحریہ نے ایک ہزار خیموں پر مشتمل بستی قائم کردی

مکلی: پاک بحریہ نے مکلی میں ایک ہزار خیموں پر مشتمل بستی قائم کردی۔ ایڈمرل نعمان بشیر نے کہا ہے کہ بحریہ تمام مصروفیات معطل کرکے امدادی کاموں میں مصروف ہے۔پاک بحریہ کے سربراہ ایڈمیرل نعمان بشیر نے آج سندھ میں ٹھٹہ، سجاول اوردیگرسیلاب زدہ علاقوں کا دورہ کیا۔ انہوں نے ریلیف آپریشنزاورخیمہ بستیوں میں متاثرین کی حالت اور انہیں فراہم کی جانے والی سہولیات کا جائزہ بھی لیا۔ نیوی کی جانب سے مکلی میں ترکی اور چین کے تعاون سے خیمہ بستی قائم کی گئی ہے،جہاں میڈیکل کیمپ اورتعلیمی ادارہ کی سہولیات بھی مہیا کی گئی ہیں۔ اس موقع پر میڈیا سے گفتگو میں ایڈمرل نعمان بشیر نے کہا کہ سیلاب زدگان کی مدد کی ہرممکن کوشش کی جارہی ہے۔ انہوں نے کہا کہ نیوی نے سیلاب زدگان کی امداد کیلئے دیگر تمام مصروفیات معطل کردی ہیں۔ایریا کمانڈروائس ایڈمیرل طیب علی ڈوگر نے ایڈمرل نعمان بشیر کوبحریہ کی امدادی کارروائیوں پربریفنگ دی۔ ایڈمیرل نعمان بشیر نے علاقہ کا فضائی جائزہ بھی لیا اور ترکی و چین کے ریلیف کیمپوں کا دورہ بھی کیا۔