جاگیر داروں نے اراضی بچانے کیلئے سیلاب کا رخ موڑا، حسین ہارون

لندن: اقوام متحدہ میں پاکستان کے مندوب عبد اللہ حسین ہارون نے کہا ہے جاگیر داروں نے اراضی بچانے کیلئے سیلاب کا رخ آبادی کی طرف موڑ دیا۔بی بی سی کے پروگرام ہارڈ ٹاک میں عبداللہ حسین ہارون نے سیلاب کی تباہ کاریوں پر تشویش کا اظہار کیا۔ انہوں نے کہا جاگیر داروں نے اپنی اراضی بچانے کیلئے آبی ریلوں کا رخ دیہات کی طرف موڑ دیا۔ جس سے کسان تباہ و برباد ہوگئے۔ عبداللہ حسین ہارون نے کہا کہ عالمی برادری نے سیلاب زدگان کی امداد کی ہے لیکن مواصلاتی نظام درہم برہم ہونے کی وجہ سے امداد کی ترسیل میں مشکلات درپیش ہیں۔ بحالی کیلئے بین الاقوامی برادری کو مزید مدد کرنا ہوگی۔