چشمہ بیراج: پانی کا بہاؤمعمول کے مطابق

میانوالی: دریائے سندھ پر جناح اور چشمہ بیراج کے مقام پر پانی کا بہاؤمعمول کے مطابق ہے جبکہ ایک ماہ بعد چشمہ جہلم لنک کینال دوبارہ کھول دی گئی ہے۔ ضلع میانوالی میں جناح بیراج کے مقام پر پانی کا اخراج دو لاکھ چودہ ہزار آٹھ سو اکیاسی کیوسک جبکہ چشمہ کے مقام پر پانی کا اخراج دو لاکھ بیاسی ہزار دو سو اٹھہترکیوسک ہے۔ ارسا کے حکم پر اٹھائیس جولائی کو بند ہونے والی چشمہ جہلم لنک کینال دوبارہ کھول دی گئی ہے اور نہر کو بیراج سے پانچ ہزار کیوسک پانی فراہم کیا جارہا ہے۔ ضلع میانوالی میں متاثرین سیلاب کے لئے بینظیر انکم سپورٹ پروگرام کے تحت انیس کروڑ بیس لاکھ روپے تقسیم کرنے کا اعلان کیا گیا ہے تاہم ابھی تک یہ کام شروع نہیں کیا گیا۔ ضلع راجن پور میں متاثرین کو کیمپوں میں ڈیڑھ ماہ سے چاول کھلائے جارہے ہیں جس سے متاثرین کی اکثریت پیٹ کی بیماریوں میں مبتلا ہوگئی ہے۔ پنجاب حکومت کی ہدایت پر ضلع کے چار مقامات جام پور، راجن پور، مٹھن کوٹ اور روجھان میں متاثرین کیلئے تندور لگا دیئے گئے ہیں جو آج سے روٹی کی فراہمی شروع کردیں گے۔ ضلع بھکر میں اسی ہزار خاندانوں، ضلع لیہ میں ایک لاکھ، ضلع ڈیرہ غازی خان میں ڈیڑھ لاکھ، ضلع راجن پور میں ایک لاکھ پچہتر ہزار جبکہ ضلع مظفر گڑھ میں دو لاکھ خاندانوں کیلئے رہائشی خیمے طلب کئے گئے مگر عید سے ایک ہفتہ قبل بھی وہ کھلے آسمان تلے پڑے ہیں۔ جنوبی پنجاب کے مختلف علاقوں میں چار سو سے زائد مریض ایسے ہیں جنہیں علاج کیلئے بڑے شہروں میں منتقل کرنے کی ہدایت کی گئی تھی مگر محکمہ صحت پنجاب ابھی تک یہ انتظام نہیں کرسکا۔ ان میں میانوالی سے پینتیس، بھکر کے پندرہ، لیہ کے بارہ، راجن پور کے ستر، مظفر گڑھ کے ایک سے پانچ اور ڈیرہ غازی خان کے پینتالیس مریضوں کے علاوہ دیگر متاثرہ علاقوں کے مریض بھی شامل ہیں۔