سانحہ سیالکوٹ: ایس ایچ او کی گرفتاری کا حکم

اسلام آباد: سپریم کورٹ نے سانحہ سیالکوٹ پر ازخود نوٹس کی سماعت کے دوران ایس ایچ او رانا الیاس کو چھ ستمبر تک گرفتار کرنے کا حکم دے دیا۔چیف جسٹس افتخار محمد چوہدری کی سربراہی میں تین رکنی بنچ نے ازخود نوٹس کی سماعت کی۔ ایڈووکیٹ جنرل پنجاب نے عدالت میں ایس ایچ اور رانا الیاس کی گرفتاری کے حوالے سے رپورٹ پیش کی۔ چیف جسٹس نے رپورٹ پر عدم اطمیان کا اظہار کرتے ہوئے اسے مسترد کر دیا۔ چیف جسٹس نے کہا کہ کوئی نہ کوئی وجہ تو ہے کہ ایس ایچ او رانا الیاس ابھی تک گرفتار نہیں ہوا۔ ڈی پی او سیالکوٹ نے عدالت کو بتایا کہ انہوں نے دس دن پہلے چارج سنبھالا ہے۔ لگتا ہے کہ کچھ لوگ ایس ایچ او کے وفادار ہیں جو معلومات افشاء کر رہے ہیں۔ انہوں نے بتایا کہ آر پی او کو عملہ تبدیل کرنے کی درخواست دے دی ہے۔ عدالت نے ڈی پی او کو آئندہ سماعت تک ایس ایچ او رانا الیاس کی گرفتاری کا حکم دیتے ہوئے مزید سماعت چھ ستمبر تک ملتوی کر دی۔