امداد کی فراہمی میں سست روی، صورتحال مزید خطرناک

اسلام آباد: اقوام متحدہ نے کہا ہے کہ امداد کی فراہمی میں سست روی کے باعث پاکستان میں سیلاب کی تباہ کاریوں سے نمٹنے میں شدید دشواریوں کا سامنا ہے۔ اقوام متحدہ کی ایجنسی برائے تعاون کے سربراہ مینئیول بیسلرنے کہا ہے کہ پاکستان میں سیلاب کے سبب بدترین انسانی بحران ہے، اس بحران کا احاطہ کرناانتہائی مشکل ہے۔ قراقرم سے بحیرہ عرب کے شمال اور جنوب تک کم از کم اسی لاکھ افراد تک رسائی کی ضرورت ہے۔ ان متاثرین کی زندگی کا انحصار روزمرہ کی امداد پر ہے۔ انہوں نے کہا کہ امداد کی فراہمی میں سست روی نے صورتحال مزید خطرناک کردی ہے۔ گزشتہ ہفتہ کے آخر سے امداد کی ترسیل بہت سست ہوچکی ہے۔ مطلوبہ فنڈ کا صرف تریسٹھ اعشاریہ چارفیصد یعنی انتیس کروڑ دس لاکھ ڈالروصول ہوسکا ہے۔