ننکانہ صاحب: چھ بسوں میں آتشزدگی، 20 افراد جھلس گئے

لاہور: ننکانہ صاحب میں جنرل بس سٹینڈ پر کھڑی چھ بسوں کو آگ لگنے سے بیس افراد جھلس گئے۔ ننکانہ صاحب میں بدھ اور جمعرات کی درمیانی رات جنرل بس سٹینڈ پر اچانک ایگ بھڑک اٹھی،جس نے دیکھتے ہی دیکھتے چھ بسوں کو اپنی لپیٹ میں لے لیا، امدادی ٹیمیں فوری جائے وقوعہ پر پہنچ گئیں۔ ایک بس کا سلنڈر پھٹنے سے بیس افراد جھلس گئے ،جنہیں طبی امداد کیلئے ہسپتال داخل کرادیا گیا۔ جھلس کر زخمی ہونیوالوں میں ریسکیو ون ون ٹو کے دو اہلکار بھی شامل ہیں۔ ابتدائی طور پر آگ لگنے کی وجہ معلوم نہیں ہوسکی۔ عینی شاہدین کا کہنا ہے کہ فائر بریگیڈ کی جانب سے آگ پر فوری قابو پالیا جاتا تو نقصان میں کمی ہوسکتی تھی۔