دادو: مکان کی چھت گرنے سے نوافرادجاں بحق

دادو: دادو کی تحصیل خیرپور ناتھن شاہ میں زیر آب مکان کی چھت گرنے سے ایک ہی خاندان کے نو افراد جاں بحق ہوگئے۔ شکار پور میں پانچ افراد ڈوب گئے۔ جوہی برانچ پر شگاف ڈال کر پانی کا رخ منچھر جھیل کی جانب موڑ دیا گیا۔ جس سے جوہی شہر زیر آب آنے کا خطرہ ہے۔ دادو میں ایم این وی ڈرین پر پڑنے والے تین شگاف اب تک پر نہیں کئے جاسکے۔ خیرپور ناتھن شاہ کو بچانے کیلئے جوہی برانچ کو کالی موری پر شگاف ڈال کر آبی ریلے کا رخ منچھر جھیل کی جانب کر دیا گیا۔ جس کے باعث جوہی شہر کو خطرہ ہے۔ ڈی سی او آفس میں اہم اجلاس ہوا جس میں فیصلہ کیا گیا کہ میہڑ، خیرپور ناتھن شاہ، سیتا اور شوگر ملز بچانے کیلئے کالی موری کے مقام پر شگاف ڈالا جائے گا۔ شگاف کی وجہ سے ایم این وی ڈرین سے آنے والا ریلا منچھر جھیل میں چلا جائے گا۔ سیلاب سے جوہی شہر کو درپیش خطرے کے بعد لوگوں کی نقل مکانی جاری ہے۔ دادو جوہی روڈ پانی میں ڈوبا ہوا ہے جس کے باعث جوہی تحصیل کا دادو سے زمینی رابطہ منقطع ہے۔ خیر پور ناتھن شاہ میں سیلاب کی زد میں آکر کچا مکان زمین بوس ہوگیا اور ایک ہی خاندان کے نو افراد جاں بحق ہوگئے۔ یہ حادثہ گاؤں شاہی لغاری میں پیش آیا۔ دو افراد اب تک لاپتہ ہیں۔