ٹھٹھہ: جاتی میں دو سو سے زائد دیہات زیر آب

ٹھٹھہ: ٹھٹھہ کی تحصیل جاتی میں دو سو سے زیادہ دیہات زیر آب ہیں۔ پنجاری نہر میں پچیس فٹ چوڑا شگاف پڑنے کے بعد جاتی شہر پانی میں ڈوب گیا۔ ملاح محلہ اور تھئی محلہ کے مکانات زیر آب ہیں۔ لوگوں نے مساجد اور گھروں کی چھت پر پناہ لے رکھی ہے۔ جاتی سجاول روڈ زیر آب ہونے کی وجہ سے لوگوں کو نقل مکانی میں مشکلات درپیش ہیں۔ جاتی کے بعد بدین سجاول روڈ پر بڈھو تالپور بھی زیر آب آگیا۔ جاتی سے نقل مکانی کرنے والے متاثرین کی بس الٹنے سے پندرہ افراد زخمی ہوگئے اور متاثرین کا سامان بھی ریلے کی نذر ہوگیا۔ بدین میں سیلاب سے شہر گولارچی اور دیگر دیہات کو بھی خطرہ ہے۔ ان علاقوں کو محفوظ رکھنے کیلئے ٹھٹھہ اور بدین کی ضلعی حدود پر سیم نالے کی پشتوں کو بلند اور مضبوط کرنا شروع کردیا گیا۔ آبی ریلا نہر بخاری شاخ میں داخل ہونے سے شوگر مل ڈوبنے کا خدشہ ہے۔ شہداد کوٹ میں گاجی کھاوڑ کے قریب پڑنے والے شگاف کے بعد شہر میں پانی کی سطح چھ فٹ ہوگئی۔ لاڑکانہ میں گیسٹرو سے دو افراد جاں بحق ہوگئے۔ جس کے بعد پیٹ کی بیماریوں کا شکار ہونے والے افراد کی تعداد پانچ ہوگئی۔ شکار پور کے علاقے گولو دڑو میں آبی ریلے میں پانچ افراد ڈوب گئے۔