سانحہ لاہور: تمام مارکیٹیں اور تجارتی مراکز بند

لاہور: سانحہ کربلا گامے شاہ کے سوگ میں آج لاہور کی تمام مارکیٹیں اور تجارتی مراکز بند ہیں اور مقامی طور پر تعطیل ہے۔ لاہور میں حضرت علی کرم اللہ وجہہ کے یوم شہادت پر جلوس میں تین خودکش حملوں کے دوران سینتیس افراد جاں بحق ہوئے، جس کے بعد شہر کی فضا سوگوار ہے۔ تمام مارکیٹیں اور تجارتی مراکز بند ہیں۔ ڈی سی او لاہور نے سانحے کے سوگ میں مقامی تعطیل کا اعلان کیا ہے۔ لاہور ہائیکورٹ کے ترجمان کے مطابق ماتحت عدالتوں میں آج کام نہیں ہوگا، اسی طرح لاہور ہائیکورٹ میں گیارہ بجے کے بعد کام بند کردیا گیا۔ سانحہ کربلا گامے شاہ کے باہر دہشت گردی میں جانی نقصان پر تمام مکاتب فکر سے تعلق رکھنے والے حلقوں نے گہرے دکھ اور افسوس کا اظہار کیا ہے، لاہور میں مارکیٹوں کے ساتھ سڑکیں بھی ویران دکھائی دیں اور ٹریفک معمول سے بہت کم رہی۔