سانحہ لاہور: دو حملہ آوروں کے جسم اور ایک کا سر مل گیا

لاہور: لاہور پولیس کے سربراہ اسلم ترین نے کہا ہے کہ گذشتہ رات ہونے والے دو حملے خود کش تھے جب کہ تیسرے کے بارے میں کچھ نہیں کہا جاسکتا۔ کمشنر نے دو حملہ آوروں کے جسم اور ایک کا سر ملنے کی تصدیق کردی۔ آج نیوز سے گفتگو میں سی سی پی او لاہور اسلم ترین نے کہا کہ تاحال تعین نہیں ہو سکا کہ دہشتگرد کہاں سے آیا۔ دو دھماکے خودکش حملہ آوروں نے کئے۔ تیسرے کے بارے میں کچھ نہیں کہا جاسکتا۔ دھماکے میں استعمال فی جیکٹ میں آٹھ سے دس کلو گرام دھماکا خیز مواد تھا۔ کمشنر لاہور نے پینتیس افراد کی ہلاکت کی تصدیق کی اور بتایا کہ دو خودکش حملہ آوروں کے جسم اور ایک کا سر مل گیا ہے۔ کمشنر لاہور کے مطابق رینجرز نے پولیس کے ساتھ مل کر صورتحال پر قابو پالیا۔ جمعتہ الوداع اور آخری عشرے میں رینجرز امن و امان کے فرائض انجام دیں گی۔