قومی اسمبلی: متاثرین کی مشکلات پر بحث نہ ہو سکی

اسلام آباد: قومی اسمبلی میں سیلاب کی تباہ کاریوں اور متاثرین کی مشکلات پر بحث نہ ہو سکی۔ مسلم لیگ ن اور ایم کیو ایم کے اراکین کے درمیان الطاف حسین کے بیان پر پھر گرما گرمی۔ بیشتر اراکین اسمبلی نے اجلاس کو وقت اور قومی وسائل کا ضیاع قرار دے دیا۔جمعرات کو شروع ہونے والا قومی اسمبلی کا یہ چوبیسواں اجلاس ہے۔ ن لیگ نے ہاؤس بزنس ایڈوائزی کمیٹی کے اجلاس کا اس بنیاد پر بائیکاٹ کیا کہ اسے قومی اسمبلی کے اجلاس کے ایجنڈے کی تیاری میں اعتماد میں نہیں لیا گیا۔ چوہدری نثار نے ایوان میں کہا کہ اجلاس تو سیلاب کی صورت حال کے لئے بلایا گیا تاہم ایک بیان جس نے پاکستان کی بنیادوں کو ہلا کر رکھ دیا ہے۔ اس کے خلاف بات نہ کرنا آئین کی پاسداری کے حلف کی خلاف ورزی ہوگی۔ ایم کیو ایم پر تنقید کا جواب دیتے ہوئے فاروق ستار نے کہا کہ متحدہ نے حکومت کی تبدیلی نہیں بلکہ نظام کی تبدیلی کی بات کی انہوں نے کہا کہ ن لیگ سمیت کسی سے محاذ آرائی نہیں چاہتے تاہم ہم تخت لاہور کی رعایا بھی نہیں۔ متعدد اراکین اسمبلی نے اجلاس کی کارروائی کو وقت کا ضیاع قرار دیا۔ قومی اسمبلی کے اجلاس کو کتنے روز تک چلانا ہے اس کے لئے بھی مشاورت ایوان کے اندر ہوئی۔ وفاقی وزیر عبدالرزاق تھہیم کے انتقال پر فاتحہ خوانی کی گئی۔ سانحہ لاہور اور کراچی کے واقعات پر توجہ نہ دینے پر ریاض حسین پیرزادہ نے ایوان سے واک آؤٹ کیا جس پر ق لیگ اور ایم کیو ایم کے اراکین نے بھی ان کا ساتھ دیا۔ضمنی انتخابات میں کامیاب ہو کر آنے والے نو منتخب اراکین نے اجلاس میں حلف بھی اٹھایا۔