سانحہ لاہور: شہداء سپرد خاک

لاہور: کربلا گامے شاہ کے باہر خودکش حملوں میں جاں بحق ہونے والوں کو ان کے آبائی علاقوں میں سپردخاک کر دیا گیا،لاہور کے ناصر باغ میں آٹھ افراد کی اجتماعی نماز جنازہ ادا کی گئی۔ ناصر باغ میں ایک کمسن بچے سمیت آٹھ افراد کی نماز جنازہ میں مرنے والوں کے عزیز و اقارب کے علاوہ اہلسنت و الجماعت سے تعلق رکھنے والے افراد نے بھی شرکت کی۔آٹھ افراد کی نماز جنازہ مولانا حیدر موسوی نیپڑھائی اس موقعے پر سکیورٹی کے فول پروف انتظامات کئے گئے تھے جبکہ پولیس کے ساتھ رینجرز بھی تعینات تھی۔ جاں بحق ہونے والے افراد میں پانچ کی نماز جنازہ بدھ کی رات اور چار کی جمعرات کی صبح ادا کی گئی دیگر افراد کی نماز جنازہ ان کے آبائی علاقوں شیخوپورہ،جھنگ،فیصل آباد اور دیگر علاقوں میں ادا کی گئی۔ اس موقے پر مولانا عبدالخالق سعدی نے کہا کہ دشمن ممالک مسلمانوں میں نفاق ڈالنے کی سازشیں کر رہے ہیں جنھیں ناکام بنا دیا جائے گا۔ اجتماعی نماز جنازہ کے بعد میتوں کو مختلف قبرستانوں میں سپردخاک کر دیا گیا۔