مقبوضہ کشمیر: بھارت مخالف مظاہرے جاری

سرینگر: مقبوضہ کشمیر میں پابندیوں کے باوجود بھارت مخالف مظاہروں کا سلسلہ جاری ہے۔ اقوام متحدہ کے سیکریٹری جنرل نے مقبوضہ وادی کی مخدوش صورتحال پر تشویش کا اظہار کیا ہے۔ کشمیر میڈیا سروس کے مطابق بھارتی پولیس نے سری نگر، سوپور، بارہ مولہ اور اسلام آباد میں عوام کو سڑکوں پر آنے سے روک دیا۔ لیکن بانڈی پور، نائیدکھائی، سمبل، ہندواڑہ اور روسم بورہ میں آزادی کے حق میں مظاہرے کیے گئے۔ بھارتی فوجیوں نے مظاہرین کو منتشر کرنے کیلئے فائرنگ اور آنسو گیس کی شیلنگ کی۔ سری نگر میں پیپلز ڈیموکریٹک پارٹی کی رہنما محبوبہ مفتی نے وادی کی بدترین صورتحال کا ذمہ دار ریاستی حکومت کو قرار دیا۔ انہوں نے احتجاجاً سول سیکریٹریٹ کے مرکزی دروازے پر تالہ لگا کر وزراء کو بند کردیا۔ دوسری جانب اقوام متحدہ کے سیکریٹری جنرل نے ایک بیان میں مقبوضہ کشمیر کی صورتحال پر تشویش کا اظہار کیا ہے۔ بان کی مون نے پاکستان اور بھارت پر زور دیا کہ کشمیر سمیت تمام مسائل پر بات چیت کیلئے نئی کوششوں کا آغاز کریں۔