طیارہ حادثہ، دہشتگردی کا عنصر خارج ازامکان قرار

گجرات: طیارہ حادثے پر حکمرانوں کی قلابازیاں آج بھی جاری رہیں کل وزیر داخلہ رحمان ملک نے کہا تھا کہ تخریب کاری خارج از امکان نہیں آج وزیر دفاع احمد مختار نے طیارے کی تباہی میں دہشت گردی کے عنصر کو خارج ازامکان قرار دے دیا۔گجرات میں میڈیا سے بات چیت کرتے ہوئے وزیر دفاع نے کہا کہ اسلام آباد میں طیارے کا حادثہ بظاہر انسانی غلطی کا نتیجہ دکھائی دیتا ہے، لیکن حتمی بات تحقیقات کے بعد یہ سامنے آئے گی۔ انہوں نے تصدیق کی کہ بدقسمت جہاز کا بلیک باکس اب تک نہیں مل سکا۔ ایک سوال پر احمد مختار کا کہنا تھا کہ بھارت کے ساتھ جنگ کا کوئی امکان نہیں کیونکہ بھارت جانتا ہے کہ جنگ کی صورت میں وہ جیت نہیں سکتا اور جنگوں میں ایٹمی ہتھیار بھی استعمال ہوسکتے ہیں۔ انہوں نے مزید کہا کہ پاک بھارت مذاکرات فوج کی وجہ سے ناکام نہیں ہوئے، الزامات لگانے سے پہلے بھارت اپنی فوج پر بھی نظر رکھے۔ احمد مختار نے کہا آئی ایس آئی پاک فوج کا حصہ ہے، جو نہ تو امریکا کے تابع ہے اور نہ ہی بالا ہی بالا کام کر رہی ہے۔ انہوں نے آئی ایس آئی پر طالبان کی مدد کے الزام کو سختی سے مسترد کرتے ہوئے اسے گمراہ کن پرپیگنڈہ قرار دیا۔ وزیردفاع نے کہا کہ پاکستان اس وقت حالت جنگ میں ہے، اسی لئے آرمی چیف کی مدت ملازمت میں توسیع کی گئی ہے۔ وزیر دفاع نے بتایا کہ ترکی اور انڈونیشیا پاکستان سے دفاعی ہتھیار خریدنے میں دلچسپی رکھتے ہیں۔