منگلا ڈیم سپل وے کے تمام گیٹ کھول دیئے گئے

لاہور: منگلا ڈیم میں پانی ذخیرہ کرنے کی گنجائش ختم ہو گئی، انتظامیہ نے سپل وے کے تمام گیٹ کھول دیئے، تربیلا ڈیم میں اگلے چوبیس گھنٹوں کے دوران اونچے درجے کے سیلاب کے خطرے کے پیش نظر عملے کو ہائی الرٹ کر دیا گیا۔ لاہور میں واپڈا حکام نے آج نیوز کو بتایا ہے کہ منگلا ڈیم میں پانی کی سطح بارہ سو پانچ فٹ تک پہنچ گئی ہے، اس میں صرف ایک فٹ مزید ذخیرہ کی گنجائش باقی ہے جو سیلاب کے دوران ڈیم سیفٹی کے لحاظ سے خالی رکھی جائے گی۔ ڈیم میں اگلے چوبیس گھنٹے کے دوران اڑھائی لاکھ کیوسک کا ریلا آنے کا امکان ظاہر کیا گیا ہے، جس کے باعث سپل وے کے تمام نو گیٹ کھول دیئے گئے ہیں۔ منگلا میں سوا دو لاکھ کیوسک پر اونچے درجے کا سیلاب تصور ہوتا ہے۔حکام نے تربیلا ڈیم کے حوالے سے بتایا کہ وہاں پر پانی کی سطح کل گنجائش سے اکتیس فٹ نیچے ہے، جس کی توقع اگست کے ایخر تک تھی لیکن وہاں پر جمعرات کی شام پانچ لاکھ اسی ہزار کیوسک کا ریلا داخل ہونے کے بعد دونوں سپل وے کھول دیئے گئے ہیں،جمعے کو وہاں پر ساڑھے چھ لاکھ کیوسک تک کے بڑے ریلے کی توقع ظاہر کی گئی ہے اور ڈیم انتظامیہ کو ہائی الرٹ کر دیا گیا ہے تاہم وہاں کے سپل وے سے اٹھارہ لاکھ کیوسک ریلا گزارنے کی گنجائش موجود ہے، ڈیموں میں ہائی فلڈ کی وجہ سے وہاں پر بجلی کی پیداوار بھی اپنی زیادہ سے زیادہ سطح تک پہنچ گئی ہے۔