جمعہ کو بارش کا سلسلہ رک جائے گا، محکمہ موسمیات

لاہور: محکمہ موسمیات کے ڈائریکٹر جنرل قمر الزماں چوہدری نے کہا ہے کہ جمعہ کو بارش کا سلسلہ رک جائے گا لیکن دریاؤں میں طغیانی برقرار رہے گی۔ آج نیوز سے بات کرتے ہوئے قمر الزمان چوہدری نے کہا کہ خیبر پختونخواہ کشمیر گلگت بلتستان اور پنجاب کے بالائی علاقوں میں گزشتہ چھتیس گھنٹوں سے بارش جاری ہے خیبر پختونخواہ میں اب تک تین سو ملی لیٹر تک بارش ہوچکی ہے جو ایک ریکارڈ ہے۔ جمعہ کی دوپہر بارہ بجے تک صورتحال میں بہتری کا امکان ہے۔ انہوں نے بتایا کہ خیبر پختونخواہ کے تمام علاقے بارش سے متاثر ہوئے اسی طرح صوبے کے تمام دریاؤں اور ندی نالوں میں طغیانی ہے۔ قمر زماں چوہدری کا کہنا تھا کہ راولپنڈی اسلام آباد میں بھی ایک سو نوے ملی میٹر تک بارش ریکارڈ کی گئی جس کے بعد محکمہ موسمیات نے وارننگ جاری کردی ہے۔ انہوں نے کہا کہ بارش اور ندی نالوں کا پانی دریاؤں میں آنے سے سیلاب کی صورتحال آئندہ چند روز برقرار رہے گی۔