سانحہ مارگلہ: جاں بحق افراد کی تدفین جاری

کراچی: اسلام آباد جہاز حادثے میں جاں بحق ہونے والے دو سگے بھائیوں کو کراچی اور ایک ہی خاندان کے چھ افراد کو مانسہرہ میں سپرد خاک کردیا گیا۔کراچی کے رہائشی فیصل رشید اورعاطف رشید کی نماز جنازہ ڈیفنس میں واقع سلطان مسجد میں ادا کی گئی حکومتی نمائندوں، سیاسی و سماجی شخصیات اور عزیز و اقارب کی بڑی تعداد نے شرکت کی ہلاک شدگان کو فیڈرل بی ایریا میں واقع قبرستان میں سپردخاک کردیاگیا سانحہ مارگلہ میں جاں بحق ہونے والے اور ایک ہی خاندان کے چھ افراد کو مانسہرہ میں سپرد خاک کردیا گیا۔ غلام رسول، اسکی بیوی گلشاد بی بی، بھائی محمد ابراہیم،بہن سبیلہ بی بی،بھانجی زبیحہ اوربیٹاراوا کو ان کے آبائی گاؤں بغہ خورد میں سپر خاک کردیا گیا۔ حادثے میں جاں بحق ہونے والے وزارت سائنس و ٹیکنالوجی کے ڈپٹی ڈائریکٹر محمد رفیق کو شیخوپورہ جبکہ چار بچوں کے باپ مسعود اسلام کو لاہور میں سپردخاک کر دیا گیا۔ شیخوپورہ کے محلہ رام گڑھ کے رہائشی دو بچوں کے باپ محمد رفیق کی میت ان کے گھر پہنچی تو ہر آنکھ اشکبار تھی۔ وہ کسی سرکاری کام سے کراچی گئے اور واپسی پر جان کی بازی ہار گئے۔ محمد رفیق دو معصوم بچوں کے علاوہ والدین اور نو بہن بھائیوں پر مشتمل کنبے کے واحد کفیل تھے۔ محمد رفیق کو سینکڑوں سوگواروں کی موجودگی میں رام گڑھ کے قبرستان میں سپرد خاک کردیا گیا۔ لاہور کے رہائشی مسعود اسلام پاکستان ڈائز کیمیکل کمپنی کے چیئرمین تھے جو کراچی میں ایک عزیز کی منگنی میں شرکت کیلئے گئے تھے۔ کاروباری کام کے سلسلے میں لاہور آنے کی بجائے اسلام آباد روانہ ہوئے اور حادثے کا شکار ہوگئے۔ مسعود اسلام تین بیٹیوں اور ایک بیٹے کے باپ تھے۔ انکے بھائی کا کہنا ہے کہ ایک سو باون خاندانوں کے ساتھ ہونے والے اس واقعہ کو فراموش کرنا ممکن نہیں۔ مسعود اسلام کی نماز جنازہ خالد مسجد کیولری گراؤنڈ میں ادا کی گئی۔ مرحوم کی رسم قل جمعہ کو انکی رہائشگاہ پر ادا کی جائے گی۔