اسلام آباد، راولپنڈی: نشیبی علاقے زیر آب

اسلام آباد: مون سون کے دوسرے مرحلے میں اسلام آباد، راولپنڈی اور دیگر علاقوں میں موسلادھار بارش سے نشیبی علاقے اور شاہراہیں زیر آب، متعدد پل ٹوٹ گئے، تین افراد جاں بحق ہوگئے، سینکڑوں گھروں میں پانی داخل، برساتی نالے چڑھ گئے، پری الرٹ وارننگ جاری،چھ بچوں سمیت ایک درجن سے زائد افراد نالوں میں بہہ گئے۔ اسلام آباد میں سیکٹر ای الیون کے برساتی نالے میں ایک شخص ڈوب گیا،جی الیون کے برساتی نالے میں مدرسہ انوار القران کے دو طلبا لاپتہ ہوگئے، جی ٹین، جی الیون، گولڑہ، اور چک شہزاد سے ملحقہ برساتی نالوں کا پانی گھروں میں داخل ہوگیا۔ شاہراہ دستور سمیت سکستھ، سیونتھ، ایٹتھ اور نائنتھ ایونیو کی شاہراہیں زیر آب آگئیں۔ کرپا ڈیم سے تین لاشیں نکال لی گئیں، دو افراد لاپتہ ہوگئے۔ پانی داخل ہونے سے پارلیمنٹ لاجز کی بیسمنٹ میں رہائش پذیر ارکان اسمبلی اور سینیٹرز وہاں سے منتقل ہوگئے ہیں۔ نالہ لئی راولپنڈی میں طغیانی کے خطرے کے پیش نظر شہر میں ریڈ الرٹ جاری کردیا اور خطرے کے سائرن بجادیئے گئے۔ کٹاریاں کے مقام پر نالہ لئی میں پانی کی سطح بیس فٹ بلند ہونے کے بعد انتظامیہ نے قریبی آبادیوں کو محفوظ مقامات پر منتقل ہونے کی ہدایت کی ہے۔ ڈھوک حسو کے علاقے میں پْل اور سوہان کے علاقے میں ایک بچہ سیلابی ریلے میں بہہ گیا۔ عظیم کالونی، صادق آباد، ڈھوک کھبہ، ڈھوک الہٰی بخش، کوہاٹی بازار، کرال، کرنگ اور سہالہ کے علاقوں میں پانی داخل ہوگیا۔ راولپنڈی میں لوہاراں بازار بورنگ روڈ پر دو منزلہ اور ضیاء الحق کالونی میں بھی ایک عمارت زمین بوس ہوگئی۔ دریائے جہلم میں سیلاب کے پیش نظر ایزاد پتن، پانہ اور پتن شیر خان کے علاقے خالی کروا لیے گئے۔ مظفرآباد میں نوسیری کے مقام پر دریائے نیلم کی سطح انیس فٹ تک بلند ہوچکی ہے۔ ماتلی واٹر ٹریٹمنٹ پلانٹ میں بارش کا پانی داخل ہونے کے بعد شہریوں کو پانی کی فراہمی معطل ہوگئی۔ مری میں چار مختلف مقامات پر لینڈ سلائیڈنگ کے بعد مری ایکسپریس وے بھاری ٹریفک کے لئے بند کردی گئی۔ گوجر خان میں سیلابی ریلے سے پل ٹوٹ گیا، کئی دیہات کا جی ٹی روڈ سے رابطہ منقطع ہوگیا۔ طوفانی بارش سے شہر اور گردونواح کے نشیبی علاقے زیر آب آگئے پانی گھروں اور دکانوں میں داخل ہوگیا۔ صندل ڈیم ٹوٹنے کا اندیشہ بھی ظاہر کیا گیا ہے، مساجد میں اعلان کے باوجود مقامی انتظامیہ لاعلم رہی۔ دوسری جانب پشاور سے رشکئی تک موٹر وے بند کردی گئی ہے۔ اٹک میں مختلف برساتی نالوں میں تین بچوں سمیت آٹھ افراد لاپتہ ہوگئے۔ ایک کی لاش نکالی لی گئی۔ اٹک میں دریا کے کنارے آباد دیہاتیوں کو گاؤں خالی کرنے کی ہدایت کردی گئی ہے اور حضرو میں ہائی الرٹ کردیا گیا۔ اٹک اور کوہاٹ کو ملانے والا خوشحال گڑھ پل بھی بند کردیا گیا ہے۔