سوات، شانگلہ: بارش و سیلاب نے تباہی مچادی

سوات: سوات، شانگلہ اور کوہستان کے علاوہ خیبر پختونخوا کے دیگر علاقوں میں بھی بارش اور سیلاب نے تباہی مچائی ہے۔ چارسدہ میں دو بچوں سمیت دس افراد جاں بحق ہوئے جبکہ سیلاب سے سیکڑوں مکانات بہہ گئے۔ پل بہہ جانے سے موٹر وے پر ٹریفک معطل ہوگئی۔ مانسہرہ میں شدید بارش کے باعث مختلف حادثات میں چار افراد ہلاک ہوگئے۔ بجلی اور ٹیلی مواصلات کی سہولتیں معطل ہیں۔ مانسہرہ میں طوفانی بارش اور سیلاب سے ضلع کوہستان میں پچاس سے زائد افراد لاپتہ ہیں۔ نوشہرہ میں کرنٹ لگنے سے تین افراد جاں بحق ہوگئے۔ داگ بے سود میں مکان کی چھت گرنے سے اے این پی شعبہ خواتین کی صدر عاصمہ نواز جاں بحق ہوگئیں ہنگو کے علاقے لختی بانڈہ میں سیلاب سے تین بچے بہہ گئے۔ کوہاٹ میں سیلاب اور جرمہ پل گرنے سے تیرہ جاں بحق ہوگئے۔ پل کے ملبے تلے متعدد افراد کے دب جانے کا خدشہ ظاہر کیا جارہا ہے۔ شکردرہ میں مدرسہ کی چھت گرنے سے تین طلبہ جاں بحق ہوگئے۔ شادی خیل اور گمبٹ میں بیس گھر منہدم ہونے سے چارافراد ہلاک جبکہ دو خواتین اور دو بچے سیلاب میں بہہ گئے۔ سیلابی ریلے ک باعث کنڈیالی بند ٹوٹنے کا خطرہ ہے جس کی وجہ سے قریبی علاقے خالی کرالیے گئے۔ڈیرہ اسماعیل خان کے علاقے ایف آر درہ زندہ میں مکان کی چھت گرنے سے دو افراد ہلاک ہوگئے۔ کرک اور ملحقہ علاقوں میں بارش سے درجنوں مکانات منہدم ہوچکے ہیں۔ حادثات میں پانچ افراد جاں بحق ہوگئے۔ ٹانک میں زام کے قریب سیلابی ریلے سے میاں بیوی کی لاشیں برآمد ہوئی ہیں۔مردان میں بارش کے باعث مواصلاتی نظام متاثر ہوگیا۔ کلتانی نالا میں درمیانی درجے کا سیلاب ہے اور بجلی بند ہونے سے شہریوں کو شدید مشکلات کا سامنا ہے۔ ایبٹ ایباد میں بارش کے باعث مکان گرنے سے ایک شخص جاں بحق ہوگیا۔ شاہراہ ریشم پر واقع حویلیاں ایوب پل مخدوش حالت کے باعث ٹریفک کے لیے بند کردیا گیا۔ عطار روڈ پر سیلابی ریلہ میں مسافر بس بہہ گئی، تیس سے زائد مسافر اب تک پھنسے ہوئے ہیں۔ ہری پور میں لینڈ سلائیڈنگ اور مکان کی چھت گرنے چھ افراد ہلاک ہو گئے۔ مانسہرہ کے مقام پر دریائے سندھ میں پانی کی آمد چھ لاکھ تیس ہزار کیوسک تک پہنچ گیا جبکہ اخراج پانچ لاکھ اٹھائیس ہزار کیوسک ہے۔