کرم: قبائلی لشکر اور عسکریت پسندوں میں جنگ بندی

پشاور: وسطی کرم ایجنسی میں مسوزئی لشکر اور مقامی عسکریت پسندوں میں جنگ بندی ہوگئی ہے۔ عسکریت پسندوں نے بائیس یرغمالی اور چار گاڑیاں لشکر کے حوالے کردیں۔ذرائع کا کہنا ہے کہ وسطی کرم میں عسکریت پسندوں اور مسوزئی لشکر کے درمیان لڑائی دس دنوں سے جاری تھی جس میں دونوں جانب سے درجنوں افراد ہلاک ہوئے۔ آج مسوزئی لشکر اور عسکریت پسندوں کے درمیان جنگ بندی ہوگئی۔ معاہدے کے تحت عسکریت پسندوں نے بائیس یرغمالی اور چار گاڑیاں لشکر کے حوالے کردیں ہے۔ دوسری جانب سیکورٹی فورسز کے گن شپ ہیلی کاپٹروں نے وسطی کرم میں شیلنگ کرکے پندرہ عسکریت پسند ہلاک کردیے۔ شیلنگ سے عسکریت پسندوں کے تین ٹھکانے تباہ ہوئے۔