گجرات: پی پی 111، سرکاری وسائل کے استعمال کا الزام

لاہور: مسلم لیگ ق پنجاب کے جنرل سیکرٹری چوہدری ظہیرالدین نے الزام عائد کیا ہے کہ گجرات کے حلقہ پی پی ایک سو گیارہ میں دھاندلی کے لئے سرکاری وسائل کا بے دریغ استعمال کیا جا رہا ہے۔لاہور میں پریس کانفرنس سے خطاب کرتے ہوئے انہوں نے کہا کہ الیکشن کمیشن کی طرف سے تقرری اور تبادلوں کے باوجود گجرات میں گوجرانوالہ اور سیالکوٹ کی پولیس کو تعینات کیا گیا ہے اور انہیں دھاندلی کی خصوصی تربیت دی گئی ہے۔ ان کا کہنا تھا کہ صوبائی وزراء سرکاری وسائل کو استعمال میں لاتے ہوئے اپنے امیدوار کی انتخابی مہم چلا رہے ہیں جبکہ لوگوں کو ہراساں کیا جا رہا ہے۔چوہدری ظہیرالدین کا کہنا تھا کہ قواعد و ضوابط کی خلاف ورزی پر الیکشن کمیشن کو کئی مراسلے بھیجے گئے لیکن کسی کا نوٹس نہیں لیا گیا۔ انہوں نے کہا کہ حکومت کے دھاندلی پلان کے باوجود مسلم لیگ ق انتخابات کا بائیکاٹ نہیں کرے گی۔