امریکا پر بلاجواز تنقید دانشمندی نہیں، عابدہ حسین

لاہور: پیپلزپارٹی کی رہنما بیگم عابدہ حسین نے کہا ہے کہ امریکا پاکستان کا اہم ا سٹریٹجک پارٹنر ہے ،اس کو بلاجواز تنقید کا نشانہ بنانا دانشمندی نہیں۔لاہور میں ایک تقریب سے خطاب کرتے ہوئے انہوں نے کہا کہ صدر آصف زرداری نے امریکا سے دہشت گردی کے خلاف جنگ کے اخراجات کا مطالبہ کیا تھا، یہ پیسے بہت جلد مل جائیں گے۔ان کا کہنا تھا کہ صدر زرداری نے نوازشریف کو عام انتخابات کا بائیکاٹ ختم کرنے پر آمادہ کیا تھا، بعض عناصر کی ان پر تنقید بلاجواز ہے۔ بیگم عابدہ حسین نے کہا کہ سابق صدر ایوب خان کے دور میں بھارت کو دریاؤں کا پانی استعمال کرنے کی اجازت دی گئی۔ انہوں نے کہا کہ پاکستان میں الیکشن نہیں سلیکشن ہوتی ہے، ارکان اسمبلی عوام کیلئے کچھ نہیں کرسکتے،لوگوں کے حقیقی نمائندے منتخب کرنے کیلئے انتخابی نظام میں تبدیلی لائی جائے۔انہوں نے کہا شدید مہنگائی کے خلاف احتجاج عوام کا حق ہے، حکمرانوں پر عوامی دباؤ کا سلسلہ جاری رہنا چاہئے۔