کمیٹی آئین میں ترامیم کیلئے کوشاں ہے، قاضی انور

لاہور: سپریم کورٹ بار کے صدر قاضی انور نے کہا ہے آئینی اصلاحات کمیٹی تہتر کے آئین کی بحالی کے بجائے ترامیم شامل کرنے کی کوشش کر رہی ہے۔وہ منصورہ لاہور میں جماعت اسلامی کے نائب امیر اسلم سلیمی اور جنرل سیکرٹری لیاقت بلوچ سے ملاقات کے بعد میڈیا سے بات چیت کر رہے تھے۔ان کا کہنا تھا کہ آرٹیکل ایک سو ستتر اور ایک سو ترانوے میں ترامیم منظور نہیں کیونکہ اس سے ججوں کی تقرر میں سیاسی مداخلت شروع ہو جائے گی۔ قاضی انور نے کہا کہ حکومت کو آزاد عدلیہ برداشت نہیں ہے۔جماعت اسلامی کے سیکرٹری جنرل لیاقت بلوچ نے کہا کہ آئینی اصلاحات کی کمیٹی کی سفارشات سے آئین اور عدالتی فیصلوں کو مجروع نہیں ہونا چاہیے،ان کا کہنا تھا کہ ایسا لگتا ہے جیسے حکومت تہتر کے آئین کی مکمل بحالی میں مخلص نہیں ہے۔جماعت اسلامی اور سپریم کورٹ بار کی ملاقات میں آئینی اصلاحات پر پارلیمانی کمیٹی کی بعض سفارشات پر تحفظات کا اظہار کیا گیا۔