عوام کو ریلیف دیں گے، گیلانی

ملتان: وزیراعظم یوسف رضا گیلانی نے کہا ہے کہ حکومت عوام کو مہنگائی اور لوڈشیڈنگ سے جلد ریلیف دے گی۔ ان کا کہنا ہے کہ گرفتار دہشت گردوں کو کسی دوسرے ملک کے حوالے نہیں کیا جائے گا۔وزیراعظم ملتان کی انڈسٹریل اسٹیٹ میں ورکرز کمپلیکس کا سنگ بنیاد رکھنے کی تقریب سے خطاب اور میڈیا سے گفتگو کر رہے تھے۔ انہوں نے کہا کہ حکومت محنت کش طبقے کو حقوق دلانے کی پالیسی پر گامزن ہے اور صوبائی حکومتوں کو ہدایت کی گئی ہے وہ کم از کم چھ ہزار روپے تنخواہ کے قانون پر سختی سے عملدرآمد کرائیں۔ وزیراعظم نے بتایا کہ انہوں نے ملتان میں قاسم بیلا دھماکے کے بعد سڑک شہریوں کے لئے کھولنے کی ہدایت کر دی ہے۔ یوسف رضا گیلانی کا کہنا تھا کہ حکومت کو عام آدمی کی مشکلات کا احساس ہے، عوام کو مسائل سے نکالنے کے لئے پالیسی مرتب کی جا رہی ہے۔وزیراعظم نے کہا کہ گرفتار دہشت گردوں کو کسی اور ملک کے حوالے کرنے کے بجائے ان کے خلاف ملکی قوانین کے تحت کارروائی کی جائے گی۔ تقریب سے وفاقی وزیر محنت خورشید شاہ نے بھی خطاب کیا۔