امریکا سے رقم کی واپسی کا مطالبہ کیا جائے، مشاہد

لاہور: مسلم لیگ ق کے سیکرٹری جنرل مشاہد حسین سید نے کہا ہے کہ امریکا سے سٹریٹجک ڈائیلاگ میں پاکستان کمزوری کا سامنا نہ کرے ، ڈیڑھ ارب ڈالر کی واپسی کا دو ٹوک مطالبہ کیا جائے۔ہیومن رائٹس سوسائٹی آف پاکستان کے زیر اہتمام تقریب کے بعد میڈیا سے بات چیت کرتے ہوئے انہوں نے کہا کہ امریکا افغانستان اور عراق میں شکست کھا چکا ہے، دونوں ملکوں سے باعزت واپسی کے لئے پاکستان اس کی مجبوری بن چکا ہے۔ ان کا کہنا تھا کہ پاکستان کو بیس سال بعد دوبارہ موقع ملا ہے کہ وہ واشنگٹن سے قومی مفادات اور عوامی جذبات کو مدنظر رکھتے ہوئے اپنے مطالبات منظور کروائے۔ مشاہد حسین نے کہا کہ دہشت گردی کے خلاف جنگ کے نام پر جو آگ پاکستان میں لگائی گئی ہے، اس کو بجھانے کے لئے اب امریکا کو ہی اپنا کردار ادا کرنا پڑے گا۔تقریب میں انسانی حقوق کو اجاگر کرنے کے لئے بہترین کارکردگی کا مظاہرہ کرنے پر میر خلیل الرحمان میموریل سوسائٹی، اجوکا تھیٹر ، پروفیسر فرخندہ اورنگزیب اور ڈاکٹر محمد رشید چوہدری مرحوم کو ایوارڈز دیئے گئے۔