کسانوں کا بھارتی سرحدپر مظاہرہ

لاہور: بھارت کی طرف سے پاکستانی دریاؤں کا پانی روکنے کے اقدامات کے خلاف کسانوں نے پاک بھارت سرحد پر احتجاجی مظاہرہ اور زیرو لائن کی طرف مارچ کیا۔متحدہ کسان محاذ کی طرف سے پاک۔بھارت سرحد سے ڈیڑھ کلو میٹر پیچھے بھارت کی جانب سے دریائے چناب کا پانی روکنے اور معاہدہ سندھ طاس کی خلاف ورزیوں پر احتجاجی کیمپ لگایا گیا،جس میں کسانوں کی بڑی تعداد نے شرکت کی،کسانوں سے یکجہتی کے لئے این جی اوز اور مختلف سیاسی جماعتوں کے کارکن بھی شریک ہوئے۔ کسانوں کا کہنا تھا کہ بھارت کی طرف سے آبی جارحیت کو کسی صورت قبول نہیں کیا جائے گا۔مظاہرین نے پاک بھارت سرحد سے کچھ دور احتجاجی نعروں کے بعد زیرو لائن کی طرف مارچ شروع کردیا اور بھارت کی جانب سے دریائے چناب پر ساول کوٹ بجلی گھر سمیت دیگر نئے منصوبوں کے خلاف نعرے بازی کی جبکہ پاکستانی حکومت سے مطالبہ کیا کہ وہ بھارت کی طرف سے دریاؤں کا پانی روکنے کے مسائل کو اقوام متحدہ میں پیش کرے۔ زیرو لائن کی طرف مارچ کرنے والوں میں صوبہ سرحد اور بلوچستان کی نمائندگی بھی موجود تھی۔لاہور سے بہاولپور تک کے سرحدی علاقوں کے کسان ستلج، راوی اور بیاس بھارت کی تحویل میں جانے کے بعد آبی قلت کا زیادہ شکار ہوئے ہیں ،ان کو جو تھوڑا ،بہت پانی مل رہا ہے وہ دریائے چناب کا ہے ،جس پر بھارت ڈیم بنا کر کم از کم پندرہ لاکھ ایکڑ فٹ پانی روکنے کی منصوبہ بندی کر چکا ہے۔