کمشنری و مجسٹریٹ سسٹم بحال کرنے کی تجویز

کراچی : مسلم لیگ فنکشنل نے سندھ میں بلدیاتی نظام میں ناظمین کے ساتھ کمشنری و مجسٹریٹ نظام بھی بحال کرنے کی تجویز دے دی۔کراچی میں وزیراعلیٰ کے مشیر امتیاز شیخ نے نیوز کانفرنس میں کہا کہ نئے بلدیاتی نظام پر پیپلز پارٹی اور متحدہ قومی موومنٹ کے مذاکرات تعطل کا شکار ہیں۔ اس لئے فنکشنل لیگ نے دونوں جماعتوں کے لئے قابل قبول تجاویز دی ہیں۔ انہوں نے تجویز دی کہ انتظامی امور کیلئے کراچی کو پانچ اضلاع جبکہ بلدیاتی امور کیلئے ٹاوٴن میں تقسیم کیا جائے۔ ڈی سی او کے بجائے میونسپل کمشنر کا عہدہ ہونا چاہئے۔ ڈسٹرکٹ کوآرڈینیشن، کمیونٹی ڈولپمنٹ، پرائمری ایجوکیشن اینڈ ہیلتھ، فنانس ایڈ پلاننگ، ورکس اینڈ سروسز، لٹریسی اور میونسپل کونسل کے محکمے ضلعی حکومتوں جبکہ پولیس سمیت دیگر محکمے صوبائی حکومت کے ماتحت کئے جائیں۔