این آر او: نظر ثانی کی درخواست دوبارہ دائر

اسلام آباد: وفاقی حکومت نے سپریم کورٹ کی طرف سے این آر او کیس میں صدر زرداری کے خلاف سوئس مقدمات دوبارہ کھولنے کے فیصلے کو چیلنج کر دیا۔ایڈووکیٹ آف ریکارڈ راجہ عبدالغفور نے سپریم کورٹ میں این آر او پر فیصلے کے خلاف نظرثانی کی درخواست اعتراضات دور کر کے دائر کی ہے۔ جس میں موٴقف اختیار کیا گیا ہے کہ درخواست گزار ڈاکٹر مبشر حسن نے این آر او کے خلاف دائر اپنی درخواست میں این آر او کو کالعدم قرار دینے کی استدعا کی تھی جبکہ سپریم کورٹ کے سترہ رکنی فل کورٹ نے استدعا سے آگے جا کر صدر آصف علی زرداری کے خلاف سوئس مقدمات دوبارہ کھولنے کا بھی حکم دیا تھا۔ درخواست میں موٴقف اختیار کیا گیا ہے کہ صدر کو آئین کے آرٹیکل دوسوواڑتالیس کے تحت استثنیٰ حاصل ہے۔ حکومت نے وکیل تبدیل کرنے کے لئے دائر درخواست بھی واپس لے لی ہے اور اب کمال اظفر ہی حکومت کی جانب سے کیس کی پیروی کریں گے۔