ججز تعیناتی، موٴقف سے دستبردارنہیں ہونگے، نواز

لاہور : سپریم کورٹ بار نے مسلم لیگ ن کے سربراہ نواز شریف سے ججز کی تقرریوں کے حوالے سے آئینی ترامیم پر حکومت کی حمایت نہ کرنے کا مطالبہ کیا ہے۔ نواز شریف نے انہیں یقین دہانی کرائی کہ اس معاملے پر اصولی موقف سے پیچھے نہیں ہٹا جائیگا۔ سپریم کورٹ بار کے صدر قاضی محمد انور کی سربراہی میں وکلاء کے وفد نے مسلم لیگ ن کے سربراہ سے دو ملاقاتیں کیں، دوسری ملاقات میں وزیر اعلٰی پنجاب شہباز شریف چوہدری نثار اور اسحاق ڈار بھی موجود تھے وفد نے نواز شریف کو آئینی ترمیم میں ججز کی تعیناتی کے طریقہ کار پر وکلاء کے تحفظات سے آگاہ کیا اور کہا کہ حکومت کی جانب سے عدلیہ سے ٹکراؤ کے سازشیں کی جارہی ہیں۔ نواز شریف نے کہا ہے کہ اعلٰی عدلیہ میں ججز کی تعیناتی کے سلسلے میں اصولی موٴقف سے دستبردار ہوں گے نہ حکومت کو اس سے انحراف کرنے دیں گے۔ انکا کہنا تھا کہ اعلی عدلیہ میں تقریاں فرد واحد نہیں بلکہ آزاد عدالتی کمیشن کی سفارشات پر پارلیمینٹ کی منظوری سے ہونی چاہئیں۔ انہوں نے کہا کہ سترویں ترمیم کے خاتمے میں تاخیر ناقابل برداشت ہے۔ قاضی انور نے کہا کہ ججز کی تقرری میں سیاسی مداخلت کم کرنے کے ساتھ جوڈیشل کمیشن میں سپریم کورٹ بار کے صدر کو شامل کیا جانا چائیے۔ جبکہ اٹارنی جنرل اور وفاقی وزیر قانون کا کردار ختم کیا جائے۔