قائمہ کمیٹی اجلاس، حاجی عدیل اورکائرہ میں گرما گرمی

اسلام آباد: سینٹ کی قائمہ کمیٹی برائے اطلاعات و نشریات کے اجلاس کے دوران وزیر اطلاعات اور حاجی عدیل کے درمیان گرما گرمی۔ قمر زمان کائرہ کا کہنا ہے کہ وزارت کے انتظامی معاملات میں قائمہ کمیٹی کی مداخلت برداشت نہیں کی جائے گی۔ سینیٹر غلام علی کی زیر صدارت قائمہ کمیٹی کے اجلاس میں قمر زمان کائرہ اور حاجی عدیل کے درمیان گرما گرمی اختیارات کے معاملے پر ہوئی۔ حاجی عدیل کا کہنا تھا کہ کمیٹی کو بتایا جائے کہ کیا وزارت اطلاعات میں تمام تقرریاں اور ترقیاں میرٹ پر اور پارلیمنٹ کی مرضی سے کی جا رہی ہیں۔ جس پر وزیر اطلاعات نے کہا کہ کمیٹی ،وزارت کے معاملات میں مداخلت نہ کرے۔ان کا کہنا تھا کہ ریڈیو اور پی ٹی وی کا معیار بہتر بنانے کے لئے تبادلے اور انکوائریاں کرائی گئی ہیں۔ کمیٹی نے ریڈیو اور ٹی وی چینلز پر وائس آف امریکا کے پروگروام نشر کرنے پر تحفظات کا اظہار کرتے ہوئے انہیں بند کرنے کا مطالبہ کیا۔ وزیر اطلاعات نے بتایا کہ پمرا قوانین کے تحت نجی ٹی وی چینلز وائس آف امریکا کے پروگرام نہیں دکھا سکتے، اس معاملے پر ایک نجی ٹی وی چینل کو نوٹس بھی دیا گیا ہے۔ انہوں نے بتایا کہ امریکا نے ریڈیو پر پروگرام کیلئے وقت خریدا ہوا ہے۔ ریڈیو یکطرفہ طور پر معاہدہ ختم کر سکتا ہے۔ کمیٹی نے بھارتی فلمیں اور ڈرامے دکھانے والے کیبلز آپریٹرز پر پابندی لگانے کی سفارش کرتے ہوئے کہا ہے کہ معاملہ حل نہ ہوا تو اسے ایوان بالا میں اٹھایا جائے گا۔