شہبازقوم سے معافی مانگیں، اراکین قومی اسمبلی

اسلام آباد: طالبان کے بارے میں وزیر اعلیٰ پنجاب شہباز شریف کے بیان پر قومی اسمبلی میں اراکین نے گرما گرم تقاریر کیں اور شہباز شریف سے مطالبہ کیا کہ قوم سے معافی مانگیں۔ طالبان کے بارے میں بیان پر ایوان میں کافی گرم ماحول دیکھنے میں آیا۔ اخونزادہ چٹان نے کہا کہ شہباز شریف کے بیان سے قبائل، صوبہ سرحد اور بلوچستان کی عوام کی دل آزاری ہوئی، وہ طالبان کے بارے میں بیان پر قوم سے معذرت کریں۔ حمزہ شہباز نے کہا کہ ن لیگ صرف پنجاب نہیں بلکہ پورے پاکستان کی بات کرتی ہے۔ این ایف سی ایوارڈ سے لے کر دہشت گردی کیخلاف قرارداد تک قومی ایشوز پر ہمیشہ حمایت کی، پنجاب کے حقوق کی بات کرنے کا طعنہ نہ دیا جائے۔ محمد اعجاز وِرک کا کہنا تھا کہ ایک دوسرے کو طعنے نہ دیئے جائیں، دہشت گردی پورے ملک کا مسئلہ ہے، جس کا خاتمہ باہمی اتحاد سے ممکن ہے۔ امیر مقام نے کہا کہ دہشت گردی صرف پنجاب کا مسئلہ نہیں، باقی صوبوں میں بھی لاشیں گرتی ہیں، نبیل گبول کا کہنا تھا کہ ن لیگ صوبائی جماعت نہیں، اس کی قیادت کو ایسے بیان نہیں دینے چاہئیں۔ چوہدری نثار علی خان نے کہا کہ پبلک اکاؤنٹس کمیٹی کی سب کمیٹی دوہفتوں میں گیس کی قیمتوں پر رپورٹ پیش کرے گی۔