کوئی غیر آئینی کام نہیں کیا، وزیراعظم

اسلام آباد: وزیر اعظم گیلانی نے کہا ہے کہ کوئی غیر آئینی کام کیا ہے نہ ہی ایئندہ کریں گے، آئینی ترامیم کے متعلق پارلیمانی کمیٹی اپنی سفارشات کو جب بھی حتمی شکل دیدے گی تو انہیں پارلیمنٹ میں پیش کر دیا جائے گا۔ منصوبہ بندی کمیشن اسلام آباد میں رواں مالی سال کیلئے پبلک سیکٹر ڈویلپمنٹ پروگرام پر اجلاس ہوا۔وزیراعظم نے نظرثانی شدہ پی ایس ڈی پی تین سو ارب روپے کرنے کی منظوری دیدی۔وزیر اعظم نے صوبوں کے مفادات کا تحفظ کرنے، سماجی شعبے، ایٹمی توانائی کمیشن، صوبہ سرحد اور بلوچستان کے ترقیاتی منصوبوں کیلئے فنڈز تیزی سے جاری کرنے کی ہدایت کی۔ میڈیا سے بات کرتے ہوئے وزیراعظم نے کہا کہ سابق صدر مشرف نے آٹھ برسوں میں پارلیمنٹ کے مشترکہ اجلاس سے خطاب نہیں کیا جو ایک قسم کی بغاوت تھی۔ صدر زرداری اپنے انتخاب کے بعد تیسری مرتبہ پارلیمنٹ سے خطاب کریں گے۔ بجٹ سے قبل نئے وفاقی وزیر خزانہ کے تقرر کے بارے میں سوال پر وزیراعظم نے کہا کہ وزیر مملکت، سیکرٹری خزانہ اور ایف بی آر کے چیئرمین مل کر اچھا کام کر رہے ہیں۔