فضائیہ کی مشق ہائی مارک دوہزار دس شروع

اسلام آباد: پاک فضائیہ کی مشق ہائی مارک دو ہزار دس شروع ہو گئی، مشترکہ آپریشنز میں پاکستان آرمی اور نیوی بھی مکمل حربی تیاریوں کے ساتھ حصہ لیں گی۔پی اے ایف کے پریس ریلیز کے مطابق اسکردو سے لے کر بحیرہء عرب تک پورے ملک کا احاطہ کرنے والی ہائی مارک دو ہزار دس کے آغاز کے موقع پرفضائیہ کے سربراہ ائر چیف مارشل راوٴ قمر سلیمان نے پاک فضائیہ کے تمام یونٹس کو ائر ٹاسکنگ آرڈرز جاری کئے۔ ان مشقوں کا بنیادی مقصد بہتر جنگی تربیت کے ساتھ ساتھ پاک فضائیہ میں حال ہی میں شامل کئے جانے والے جدید آلات کو استعمال کر کے حقیقت کے قریب تر حربی ماحول پیدا کرنا ہے۔ مشقوں میں جے ایف سیونٹین تھنڈر، ساب ٹو تھاوٴزینڈ اور فضا سے فضا میں ایندھن فراہم کرنیوالے طیارے پہلی بار حصہ لے رہے ہیں۔ ہائی مارک دو ہزار دس پاک فضائیہ کی سب سے بڑی آپریشنل سرگرمی ہے جو پانچ سال کے بعد ہو رہی ہے۔