بیدخل پاکستانی طلباء برطانیہ میں تعلیم کے خواہاں

اسلام آباد: برطانیہ سے بے گناہ قرار دئیے جانے کے باوجود پاکستان واپس بھیجے جانے والے چار پاکستانی طلباء نے مطالبہ کیا ہے کہ انہیں برطانیہ میں اپنی تعلیم مکمل کرنے کی اجازت دی جائے، ایک طالبعلم کا کہنا ہے کہ اس سے اپیل کا حق بھی چھین لیا گیا۔پاکستان واپس بھیجے جانے والے طلباء طارق رحمان، وہاب، شعیب اور رمضان نے آج نیوز سے بات چیت میں بتایا کہ برطانوی ہوم ڈیپارٹمنٹ نے الزامات واپس لے کر انہیں پاکستان بھجوادیا تا ہم اسلام آباد پہنچنے پر جو دستاویزات طلبا کو دی گئیں ان میں الزامات موجود تھے۔ طلبا نے بتایا کہ دوران تفتیش انہیں انتہائی خوفناک ماحول میں رکھا گیا۔ ایک طالبعلم طارق رحمان نے بتایا کہ جیل میں بھی کتوں کی مدد سے اس کے کمرے کی تلاشی لی گئی۔طالبعلم رمضان کا کہنا تھا کہ برطانیہ سے واپس بھجواتے وقت اسے اپیل کا حق دینے اور تعلیم جاری رکھنے کی یقین دہانی کرائی گئی لیکن بعد میں برطانوی حکام نے اس سے صاف انکار کر دیا۔ حصول تعلیم کیلئے برطانیہ جانے والے یہ پاکستانی طالبعلم معصوم اور بے گناہ ثابت ہونے کے باوجود اپنے مقصد کی تکمیل کے لئے انصاف کے منتظر ہیں۔