اسلحہ جمع کرنیکی رپورٹ سرکاری اداروں نے دی، گورنر سندھ

کراچی: گورنر سندھ ڈاکٹر عشرت العباد نے کہا ہے کہ کراچی میں اسلحہ جمع کرنے کی رپورٹ سرکاری اداروں نے دی ہے۔ نئے بلدیاتی نظام پر بات چیت آگے بڑھ رہی ہے اور اتحادیوں میں کوئی ڈیڈ لاک نہیں ہے۔ گورنر سندھ ڈاکٹر عشرت العباد نے وزیر بلدیات آغاسراج درانی اور ایڈمنسٹریٹر کراچی فضل الرحمن کے ہمراہ شہر کے ترقیاتی منصوبوں کاجائزہ لیا۔ زیر تعمیر بنارس چوک فلائی اوور پر میڈیا سے بات چیت میں گورنر نے کہا کہ قانون نافذ کرنے والے ادارے امن وامان کے لئے حکمت عملی تیار کررہے ہیں۔ گورنر نے بتایا کہ بلدیاتی نظام میں ترامیم کے لئے اتحادی جماعتوں میں بات چیت اگے بڑھ رہی ہے اور کسی بھی مرحلے پر ڈیڈ لاک نہیں آیا۔ گورنر نے کہا کہ کیماڑی سے متصل ساحلی علاقے سے آئیل ٹنکرز ہٹانے کے لئے سپریم کورٹ کے فیصلے پر عمل کیا جائے گا۔ اس موقع پرصوبائی وزیر آغاسراج درانی نے منتخب نمائندوں کی عدم موجودگی میں ترقیاتی کام متاثر ہونے کے تاثر کی نفی کی۔ اس سے پہلے گورنر اور وزیر بلدیات نے عبداللہ شاہ غازی کے مزار پر حاضری دی اور فاتحہ خوانی کی۔