پی پی ن لیگ کی سازشوں سے باخبر رہے، ق لیگ

گجرات: مسلم لیگ ق پنجاب کے صدر چوہدری پرویز الٰہی نے کہا ہے کہ پیپلز پارٹی والے مسلم لیگ ن کی سازشوں سے با خبر رہیں اور ان کی عوام دشمن پالیسیوں کا حصہ نہ بنیں۔ گجرات میں احتجاجی ریلی سے خطاب کرتے ہوئے انہوں نے کہا کہ سابق صدر پرویز مشرف کو برا کہنے والے ان سے دس سالہ ڈیل اور وفاقی وزراء کو حلف اٹھوانے پر قوم سے معافی مانگیں۔ ان کا کہنا تھا کہ نواز شریف گجرات کے ضمنی انتخابات تک صدر آصف زرداری کے خلاف کوئی بیان نہیں دیں گے لیکن اس کے بعد مفادات کی ایک نئی جنگ کا آغاز کر دیا جائے گا۔ انہوں نے کہا کہ پی پی ایک سو گیارہ میں کسی کو دھاندلی اور غنڈہ گردی کی اجازت نہیں دی جائے گی۔ چوہدری پرویز الٰہی نے کہا کہ عوام سے جھوٹے وعدوں پر ووٹ لینے والے پنجاب کے حکمرانوں نے صوبے کو دیوالیہ کر دیا ہے۔ ان کا کہنا تھا کہ سابق دور میں تعمیر کئے گئے پچاس اسکولوں میں دو سال گزرنے کے باوجود اسٹاف بھرتی نہیں کیا گیا۔