شیر افگن کا نئی مسلم لیگ بنانیکا اعلان

میانوالی: سابق وفاقی وزیر ڈاکٹر شیر افگن نیازی نے مسلم لیگ ق سے علیحدگی کا اعلان کرتے ہوئے کہا ہے کہ وہ جنرل پرویز مشرف کا ساتھ نہیں چھوڑیں گے، نئی جماعت رجسٹر کرائی جا رہی ہے اور سابق صدر جلد وطن واپس آ کر اپنا سیاسی کردار ادا کریں گے۔میانوالی میں میڈیا سے بات چیت کرتے ہوئے انہوں نے کہا کہ وہ دوستی اور دشمنی نبھانا جانتے ہیں اور سابق صدر پرویز مشرف کو تنہا نہیں چھوڑیں گے۔ ڈاکٹر شیر افگن نے بتایا کہ آل پاکستان مسلم لیگ کے نام سے نئی جماعت کی رجسٹریشن کے لئے درخواست جمع کرا دی گئی ہے۔ ان کا کہنا تھا کہ پرویز مشرف کو عوامی پذیرائی حاصل ہو رہی ہے اور وہ جلد وطن واپس آ کر اپنا سیاسی کردار ادا کریں گے۔ انہوں نے کہا کہ وفاقی اور صوبائی حکومتوں کی ناکامی کے بعد مڈٹرم انتخابات ضروری ہو گئے ہیں جبکہ انہیں شریف برادران کا سیاسی کردار ختم ہوتا نظر آ رہا ہے۔