لاہور: پندرہ سو کلو گرام دھماکا خیز مواد برآمد

لاہور: لاہور پولیس نے دہشت گردی کا بڑا منصوبہ ناکام بنا دیا،علامہ اقبال ٹاؤن میں ایک گھر سے پندرہ سو کلو گرام دھماکا خیز مواد، ہینڈ گرنیڈ اور بڑی تعداد میں اسلحہ برآمد کرکے گودام کے مالک سمیت بارہ مشتبہ افراد کو حراست میں لے لیا گیا۔ پولیس کے مطابق علامہ اقبال ٹاؤن میں سرچ آپریشن کے دوران مہران بلاک کے ایک گھر پر چھاپہ مارا گیا، جہاں سے پندرہ سو کلو گرام دھماکا خیز مواد، خودکش جیکٹس، سولہ روسی ساختہ ہینڈ گرنیڈز اور ایل ایم جی رائفل کی سینکڑوں گولیاں برآمد ہوئیں، جنہیں قبضے میں لے لیا گیا۔ بم ڈسپوزل اسکواڈ نے موقع پر پہنچ کر دھماکا خیز مواد کو ناکارہ بنایا۔ ایس پی اقبال ٹاؤن علی ناصر رضوی نے میڈیا سے بات چیت کرتے ہوئے کہا کہ دھماکا خیز مکمل تیار تھا، اسے صرف استعمال کیا جانا تھا، اور اس کے پھٹنے سے پانچ سو میٹر تک کے علاقے میں تباہی پھیل سکتی تھی۔ پولیس ذرائع کے مطابق یہ گھر اکمل کی ملکیت ہے اور اسے کچھ عرصہ پہلے عمر نامی شخص نے اقبال کی ضمانت پر کرائے پر حاصل کیا تھا، جو چند روز پہلے یہاں سے پراسرار طور پر غائب ہو گیا۔ پولیس نے کرائے دار کے ضمانتی کے اہلخانہ کو بھی حراست میں لے لیا ہے۔ اس موقعے پر سی سی پی او لاہور نے کہا کہ پولیس نے بروقت کارروائی کرتے ہوئے شہر کو تباہی سے بچا لیا ہے۔ پولیس کا کہنا ہے کہ بہت جلد دہشت گردوں کا یہ نیٹ ورک بھی پکڑ لیا جائے گا۔