سرجڑی بچیاں، معائنے کیلئے بورڈ تشکیل

اسلام آباد: ساہیوال کی سر جڑی بچیوں کے طبی معائنے کے لئے پانچ رکنی میڈیکل بورڈ تشکیل دے دیا گیا۔پاکستان بیت المال علاج کے تمام اخراجات برداشت کرے گا۔ زمرد خان کا کہنا ہے کہ بچیوں کو بیرون ملک بھی بھیجا جاسکتا ہے۔پمز اسپتال اسلام آباد میں صحافیوں گفتگو کرتے ہوئے ایم ڈی بیت المال زمرد خان نے بتایا کہ ڈاکٹر خلیق الزمان اور ڈاکٹر ظہیر عباسی ، ڈاکٹر کرنل عذرا، ڈاکٹر حمید اللہ اور ڈاکٹر ایس ایم نور پر مشتمل پانچ رکنی میڈیکل بورڈ بچیوں کے معائنے کے بعد آپریش کا فیصلہ کرے گا۔ انہوں نے بتایاکہ صدر آصف زرداری اور وزیر اعظم یوسف رضا گیلانی نے بھی بچیوں کو ہر ممکن علاج کی سہولت فراہم کرنے کی ہدایت کی ہے۔ زمرد خان نے بچیوں کے علاج کے لئے پانچ لاکھ اور بچیوں کے والدین کو پچاس ہزار روپے کا چیک دیا۔ڈاکٹر خلیق الزمان نے بتایا کہ بچیوں کے چہرے جڑے ہوئے ہیں ممکن ہے دماغ بھی جڑے ہوئے ہوں، تفصیلی طبی معائنے کے بعد ہی علاج کا فیصلہ کیا جائے گا۔ ڈاکٹر ظہیر عباسی کا کہنا تھا کہ یہ ایک پیچیدہ کیس ہے، علاج میں چھ ماہ بھی لگ سکتے ہیں۔