صدرکو پارلیمنٹ سے خطاب نہ کرنیکا مشورہ

لاہور: وزیراعلیٰ پنجاب شہباز شریف نے کہا ہے کہ سترہویں ترمیم کے خاتمے سے پہلے صدر پارلیمنٹ کے مشترکہ اجلاس سے خطاب نہ کریں۔لاہور میں جامعہ نعیمیہ میں خطاب میں شہباز شریف نے بتایا کہ صدر کو یہ مشورہ مسلم لیگ ن کے قائد میاں نواز شریف نے دیا ہے۔ وزیر اعلیٰ پنجاب نے یہ نہیں بتایا کہ صدر کو مشورہ کب اور کس طرح دیا گیا ہے۔ جامعہ نعیمیہ میں خطاب میں شہباز شریف نے کہا کہ پارلیمنٹ کو اس کی کمزوریوں کے باوجود کام کرنے کا موقع دیا جانا چاہیے۔ طالبائزشن کو اس بات کا اندازہ ہونا چاہیے کہ موجودہ حکومت امریکی ایجنڈے پر کام نہیں کر رہی۔ انہوں نے کہا کہ کیری لوگر بل سمیت کئی معاملات پر امریکی پالیسوں کے خلاف آواز اٹھائی ہے۔ پاکستان کے ساتھ اچھے اور برے حالات میں تعلقات رکھنا امریکا کی مجبوری ہے۔ شہباز شریف نے کہا کہ علما فروعی اختلافات بھلا کر ایک پلیٹ فارم پر اکھٹے ہوں اور قوم کو متحد کرنے کے لیے کام کریں۔