لاہوردھماکے: شہدا سپردخاک

فیصل آباد:  آر اے بازار لاہور کے خودکش دھماکے میں شہید ہونے والے تین افراد کو ساہیوال اور فیصل آباد میں ان کے آبائی قبرستانوں میں سپردخاک کر دیا گیا۔محمد احمد خان کی نماز جنازہ فیصل آباد کے گاوٴں دو سو چار آر بی میں ادا کی گئی، جس میں ارکان اسمبلی،انتظامیہ اور اس کے عزیز و اقارب کے علاوہ گاوٴں کے لوگوں نے شرکت کی۔ آرمی کے جوانوں نے اس موقعے پر محمد احمد خاں کو آخری سلامی پیش کی، جس کے بعد فوجی اعزاز کے ساتھ سپردخاک کر دیا گیا۔ وزیر اعظم یوسف رضا گیلانی، آرمی چیف اور وزیر اعلیٰ پنجاب کی جانب سے پھولوں کی چادریں چڑھائی گئیں۔ شہید محمد احمد کے بھائی رحمت خان نے میڈیا سے بات چیت کرتے ہوئے کہا وہ ملک و قوم کے لئے اپنے بھائی کے نقش قدم پر چلتے ہوئے قربانی پیش کرنے کے لئے تیار ہیں۔ دھماکے میں شہید ہونے والے محنت کش جاوید اقبال نے اپنے پسماندگان میں بوڑھے والدین،ایک بیوہ ،تین بیٹے اور ایک بیٹی چھوڑی ہے،سب سے چھوٹے بیٹے کی عمر صرف تین ماہ ہے۔ ساہیوال کے قصبہ نور شاہ میں انہیں ان کے آبائی قبرستان میں سپرد خاک کر دیا گیا۔محمد اکرم فوج کی انجیئنرنگ کور میں بطور مستری کا کام کرتاتھا۔اس نے اپنے سوگواروں میں تین بیٹیاں اور ایک بیٹا چھوڑا ہے، اسے ساہیوال کی تحصیل چیچہ وطنی میں ان کے آبائی قبرستان میں سپرد خاک کر دیا گیا۔