رواں ماہ آئینی ترامیم منظور کرا لی جائینگی، کائرہ

لالہ موسیٰ: وفاقی وزیر اطلاعات و نشریات قمر زمان کائرہ نے کہا ہے کہ تئیس مارچ تک آئینی ترامیم پارلیمنٹ سے منظور کرالی جائیں گی۔ بلدیاتی انتخابات جماعتی بنیادوں پر کرانے کیلئے تمام پارٹیاں متفق ہیں۔ لالہ موسی میں میڈیا سے بات چیت میں قمر زمان کائرہ نے کہا کہ بلدیاتی انتخابات جماعتی بنیادوں پر کرانے پر تمام جماعتیں متفق ہیں، البتہ اختلاف صرف طریقہ کار پر ہے۔ پورے ملک میں یکساں بلدیاتی نظام کیلئے رابطے جاری ہیں۔ آئین کو انیس سو تہتر کی اصل روح کے مطابق ڈھالا جارہا ہے اور آئینی ترامیم تئیس مارچ تک پارلیمنٹ کے مشترکہ اجلاس سے منظور کرالی جائیں گی۔ وفاقی وزیر اطلاعات نے کہا کہ ہندوستان نے پانی نہیں روکا، لیکن خطرہ ہے کہ ضرورت کے وقت کہیں بھارت پانی روک نہ لے۔ انہوں نے کہا کہ عوامی حمایت سے دہشت گردی کی باقیات کا مقابلہ کیا جائے گا۔