اسلام آباد: دو سو مشتبہ افراد گرفتار

اسلام آباد: وفاقی دارالحکومت اسلام آباد اور راولپنڈی کے جڑواں شہروں میں سرچ آپریشن کے دوران افغان باشندوں سمیت دو سو مشتبہ افراد کو گرفتار کرلیا گیا۔پولیس ذرائع کے مطابق اتوار کو پولیس اور قانون نافذ کرنے والے اداروں نے راولپنڈی میں بنگش کالونی، پیرودھائی بس اسٹینڈ ، فوجی کالونی، گنج منڈی اور ہزارہ کالونی میں سرچ آپریشن کیا، اس دوران مناسب شناختی دستاویزات نہ ہونے پر چھیانوے مشتبہ افراد کو گرفتار کر لیا گیا جن سے پوچھ گچھ کی جا رہی ہے۔ گرفتار افراد میں افغان باشندے بھی شامل ہیں۔ وفاقی دارالحکومت اسلام آباد میں بھی پولیس نے آبپارہ، سہالہ، گولڑہ، بری امام اور دیگر علاقوں میں سرچ آپریشن کے دوران ایک سو چار مشتبہ افراد کو گرفتار کیا اور تفتیش کے لئے نامعلوم مقام پر منتقل کردیا۔