آئین کی حکمرانی اس ماہ قائم ہو جائیگی، ن لیگ

گجرات: پاکستان مسلم لیگ ن کے مرکزی رہنما رکن قومی اسمبلی خواجہ سعد رفیق نے کہا ہے کہ آئین کی حکمرانی اس ماہ قائم ہو جائے گی، قوم دعا کرے کہ آئینی ترامیم کا پل صراط عبور ہو جائے۔ وہ گجرات میں حلقہ پی پی ایک سو گیارہ کے ضمنی انتخاب کیلئے ن لیگ کے نامرد امیدوار حاجی عمران ظفر کی رہائشگاہ پر نیوز کانفرنس سے خطاب کر رہے تھے۔ خواجہ سعد رفیق نے کہا کہ ملک سے دہشت گردی کے خاتمے کیلئے نیشنل سیکورٹی پلان تشکیل دینے کی ضرورت ہے۔ ملک میں دہشت گردی ، لوڈ شیڈنگ ، غربت اور بدامنی کے ذمہ دار چوہدری برادران اور پرویز مشرف ہیں۔ ان کا کہنا تھا کہ اگر شیخ رشید ، چوہدری پرویز الٰہی اور دیگر رہنما بارہ سال پہلے بغاوت نہ کرتے تو پرویز مشرف حکومت کا ایک سال میں دھڑن تختہ ہو جاتا۔ خواجہ سعد رفیق نے کہا کہ گجرات میں چوبیس مارچ کو ضمنی الیکشن فری اینڈ فیئر ہوں گے اور مسلم لیگ ن عوامی طاقت سے مشرف کی باقیات پر آخری ضرب لگائے گی۔انہوں نے کہا کہ یہ الیکشن چوہدری اور شریف برادران کے درمیان نہیں بلکہ دو نظریات رکھنے والی جماعتوں کے درمیان ہے۔