گجرات: ضمنی الیکشن، سیاسی گرماگرمی

گجرات: گجرات میں پنجاب اسمبلی کے حلقے ایک سو گیارہ کے ضمنی انتخاب کے لیے مسلم لیگ ن اور مسلم لیگ ق کے درمیان گرما گرمی بڑھ گئی ہے۔ جھگڑے کے بعد ق لیگ کے کارکنوں کا احتجاج اور ٹائر نذر آتش کئے۔ اتوار کو انتخابی مہم کے موقع پر گجرات شہر کے سیاسی درجہ حرارت میں اضافہ ہوگیا۔ مسلم لیگ ن نے اپنے امیدوار حاجی عمر ان ظفر کی انتخابی مہم کے لیے بازار میں رابطہ تاجر مہم چلائی۔ مہم کی قیادت ن لیگ کے رہنما خواجہ سعد رفیق اور سینیٹر پرویز رشید کر رہے تھے۔ مہم کے دوران مسلم لیگ ن اور ق لیگ کے کارکنوں میں نعرے بازی ہوئی اور نوبت ہاتھا پائی تک پہنچ گئی۔ مسلم لیگ ق نے الزام عائد کیا کہ ان کے کارکن اور تاجر شیخ وقار حیدر کو تشدد کا نشانہ بنایا گیا جس سے وہ زخمی ہوگئے۔ مسلم لیگ ن کے رہنما خواجہ سعد رفیق نے کہا کہ کارکنوں کے جھگڑے کو پولیس نے بیچ بچاؤ کے ذریعے ختم کرادیا۔ اس معاملے کو سیاسی تصادم کی شکل نہ دی جائے۔ اس واقعہ کے بعد مسلم لیگ ق کے رہنما پرویز الہی اور وجاہت حسین اپنے امیدوار میاں عمران سعود کی انتخابی مہم چلانے بازار پہنچ گئے۔ شاہ دولہ پولیس چوکی پر ق لیگ کے کارکنوں نے احتجاج کیا اور ٹائر نذر آتش کیے۔ پرویز الہی نے کارکنوں سے خطاب کیا۔ مسلم لیگ ق کے کارکنوں نے روڈ بلاک کردی اور دکانیں بند کرادیں۔ اور مسلم لیگ ن کے رہنماوٴں کے خلاف تھانے میں مقدمہ درج کرنے کی درخواست دی۔ مسلم لیگ ق کے تاجروں نے کل ہڑتال کا اعلان کیا جبکہ ن لیگ کے تاجروں نے ہڑتال سے لا تعلقی ظاہر کردی۔