آزاد کشمیر: سرکاری ویب سائٹ پرغلطی کا انکشاف

مظفرآباد: حکومت آزاد کشمیر کی سرکاری ویب سائٹ پر سنگین غلطی کا انکشاف ،دو وزراء کو ایک ہی محکمے کا وزیر ظاہر کر دیا گیا۔ اس ویب سائٹ کو اپ گریڈ کرنے کے لئے حکومتی خزانے سے ہر ماہ لاکھوں روپے ادا کئے جاتے ہیں۔حکومت آزاد کشمیر کی جانب سے لانچ کی جانے والی سرکاری ویب سائٹ پر وزراء کے ناموں میں غلطی تو معمول کی بات تھی۔ مگر اس مرتبہ سنگین غلطی کرتے ہوئے سردار سیاب خالد اور چوہدری رخسار کو ایک ہی وقت میں محکمہ سیاحت، کھیل، ثقافت اور امور نوجوانان کا وزیر ظاہر کیا گیا ہے۔ اس سے پہلے بھی سابق وزیر اعظم سردار یعقوب کے مستعفی ہونے کے ایک ماہ تک انہیں وزیر اعظم ظاہر کیا جاتا رہا۔ سرکاری ویب سائٹ کو اپ گریڈ کرنے کے لئے حکومت کی جانب سے ایک نجی کمپنی کو باقاعدہ ہر ماہ لاکھوں روپے ادا کئے جاتے ہیں۔ مگر مانیٹرنگ کا موثر نظام نہ ہونے کے باعث اس ویب سائٹ پر اکثر و بیشتر غلطیاں دیکھنے میں آتی ہیں۔