پاک فوج کی زیرنگرانی پولیس کی تربیت

سیالکوٹ: گوجرانوالہ ریجن کے دو سو دو پولیس اہلکاروں نے پاک فوج کی زیرنگرانی انسداد دہشت گردی کا خصوصی تربیتی کورس مکمل کر لیا۔ سیالکوٹ کینٹ میں پاکستان آرمی کی طرف سے پولیس کو دی جانے والی ٹریننگ کے حوالے سے اختتامی تقریب ہوئی جس میں گیریڑن آفیسر کمانڈنگ میجر جنرل خالد محمود،پاک فوج اور پولیس افسروں نے شرکت کی۔ اس موقعے پر تربیت حاصل کرنے والے پولیس اہلکاروں نے اپنی مہارت کا عملی مظاہرہ کیا۔ آئی ایس پی آر کی پریس ریلیز کے مطابق دہشت گردی سے نمٹنے کے لئے پاک فوج نے اب تک صوبہ سرحد کے آٹھ ہزار اور پنجاب کے ایک ہزار ایک سو پانچ پولیس اہلکاروں کو انسداد دہشت گردی کی خصوصی تربیت دی ہے جبکہ رواں برس پنجاب پولیس کے مزید نو ہزار اہلکاروں کو ٹریننگ دی جائے گی۔ تقریب سے خطاب کرتے ہوئے جی او سی میجر جنرل خالد محمود نے دہشت گردی کے خلاف خصوصی کورس کی اہمیت پر زور دیتے ہوئے کہا کہ اس ٹریننگ سے دہشت گردی کے خلاف جنگ میں پولیس کی استعداد کار میں اضافہ ہو گا۔ آخر میں انہوں نے تربیتی کورس میں اعلی پوزیشنز حاصل کرنے والوں میں انعامات تقسیم کئے۔