جنوبی وزیرستان: محسود قبائل اور پولیٹیکل انتظامیہ کا جرگہ

پشاور: جنوبی وزیرستان میں آپریشن راہ نجات کے بعد پیدا ہونے والی صورتحال سے نمٹنے کے لئے محسود قبائل اور پولیٹیکل انتظامیہ کے درمیان جرگے میں دونوں نے اپنی اپنی شرائط پیش کردیں۔ محسود قوم نے جرگے میں اپنی تیرہ نکاتی شرائط پیش کی جن میں مفت ٹرانسپورٹ، جانی ومالی نقصانات کا ازالہ، منجمد مراعات کی بحالی، ریاستی مشینری کی منتقلی، بندوبستی علاقوں میں ایف سی آر کے تحت کارروائی سے گریز، واپسی کے لئے فی خاندان ایک لاکھ روپے نقد، چھ ماہ کا راشن اور وزیرستان کے لئے بھرپور ترقیاتی پیکیج شامل ہیں۔ جرگے میں پولیٹیکل انتظامیہ کی جانب سے چار نکاتی مطالبات پیش کیے گئے جن میں مطلوب دہشت گردوں کی حوالگی، بھاری اسلحہ پر مکمل پابندی، متوازی انتظامی و عدالتی نظام کا خاتمہ اور ریاست کے خلاف کارروائیوں میں ملوث افراد کو پناہ نہ دینے کی ہدایت شامل ہے۔