ججز کے تقرر کیلئے عدالتی کمیشن کی تجویز

اسلام آباد: پاکستان بار کونسل نے اعلٰی عدالتوں میں ججز کے تقرر کیلئے بیس رکنی عدالتی کمیشن تشکیل دینے کی تجویز پیش کرتے ہوئے مجوزہ پارلیمانی کمیٹی کو مسترد کردیا۔ اسلام آباد میں پاکستان بار کونسل کے اجلاس کے بعد میڈیا کو بریفنگ دیتے ہوئے بار کونسل کے وائس چیئرمین ابو الانعام نے بتایا کہ اجلاس میں سابق اٹارنی جنرل ملک قیوم کے خلاف تادیبی کارروائی کے معاملے پر بھی غور کیا گیا۔ ان کا کہنا تھا کہ سپریم کورٹ اور ہائی کورٹس میں ججوں کے تقرر کے حوالے سے تمام تر اختیارات عدالتی کمیشن کے پاس ہونے چاہئیں۔ ابوالانعام نے بتایا کہ پاکستان بار کونسل نے سپریم کورٹ کے چیف جسٹس دو سینئر ترین ججوں، چاروں ہائی کورٹس کے چیف جسٹس صاحبان، وائس چیئرمین پاکستان بار کونسل، صدر سپریم کورٹ بار، چاروں ہائی کورٹ بار کے صدور، وزیراعظم کی طرف سے نامزد کردہ رکن قومی اسمبلی اور حزب اختلاف کی طرف سے نامزد کردہ رکن قومی اسمبلی اور چاروں صوبوں کے نمائندہ چار سینٹرز پر مشتمل عدالتی کمیشن بنانے کی تجویز دی ہے۔ ان کا کہنا تھا کہ ججوں کے تقررکے لئے چیف جسٹس کے بجائے عدالتی کمیشن سے مشاورت کی جانی چاہیے۔ بار کونسل نے سابق اٹارنی جنرل ملک قیوم کی جانب سے سوئس حکومت کو ازخود خط لکھنے کا معاملہ حکومت کو واپس بھجوا دیا۔